Ekstremsportveko vart for fyrste gong arrangert i 1998 og har sidan den gong opparbeida seg ein posisjon som verdas største og mest unike ekstremsportarrangement. Stiftinga Ekstreme Voss, med klubbane Voss Fallskjermklubb, Voss Rafting Klubb, Voss Hang- og Paraglidarklubb og Voss Kajakk klubb, står bak arrangementet.
Her er det dei skriv i utlysinga etter trainee:
"Ekstremsportveko starta i det små, tufta på eit brennande engasjement for naturbaserte aktivitetar i vill vestlandsnatur. Arrangementet er framleis tufta på dugnad, men har i løpet av dei siste åra opparbeida seg ein posisjon som verdas største ikkje-kommersielle ekstremsportarrangement. Ein viktig grunn til dette er at ”veko” ikkje handlar kun om sport. Musikk og kultur har vore ein viktig del av festivalen i mange år, og kvart år arrangerer me ein eigen musikkfestival som går over tre dagar. Denne foreininga av to ulike spekter innan kulturlivet har gjeve oss ei særstilling i den norske festivalfloraen.
Arbeidsoppgåver
Stillinga omfattar alle prosessane i samband med festivalen. Døme på arbeidsoppgåver er inngåing av samarbeidsavtalar, innhenting av løyver, økonomi, marknadsføring, koordinering av sport- og festivalprogram, etc. Ein viktig del av arbeidet vil vera den praktiske gjennomføringa av festivalen i 2007. Vedkomande kjem til å jobba tett med noverande dagleg leiar og målsetjinga er at vedkomande skal kunna overta som dagleg leiar på sikt.
Kvalifikasjonar
Me er på jakt etter eit talent innan prosjektleiing. Talent og personlege eigenskapar er viktigare enn ei formell utdanning, men høgare utdanning er heilt klart eit pluss. Viktige kvalifikasjonar for stillinga er stor arbeidskapasitet, initiativ, eit stort nettverk og gode IT kunnskapar.
Kort om stillinga
Arbeidsstad: Voss
Løn: etter avtale
Tiltreding: etter avtale
Språk: nynorsk og engelsk
Søknad
Søknadsfrist: 8. august, 2006
Søknad inkludert CV skal sendast til: erik@skigutane.com"